Guilty ang hatol kay CJ Corona

Chief Justice Renato Corona

(May 30, 2012-Miyerkules- Script na sinulat ni Alih Anso para sa programang “Buhay –buhay  ” (8:00-9:00 A.M) sa segment na “Gabay at Talalakayang Pampamilya”. Host –Nenita Minted)

NENITA: “Ang ulo ng balita nitong umaga ay: “Guilty ang naging hatol ng Senate impeachment court kay Supreme Court (SC) Chief Justice Renato Coronado Corona.

Bomoto ang 20 senator-judges na nagkasala ang punong mahistrado sa ilalim ng Article 2 ng impeachment complaint o hindi pagsasapubliko at hindi tamang deklarasyon sa statement of assets, liabilities and net worth (SALN). At sa umagang ito ay lalo pang lilinawin ni Kaka Alih ang  mga usapin sa likod ng balitang ito…

(Play- Intro- Gabay at Talakayang Pampamilya)

NENITA: Magandang umaga Kaka Alih,

KAKA ALIH: Magandang umaga din Kapatid na Nenita,   assallamu alaikum warahmatullahi wabarakatuh, (ang kapayapaan at pagpapala ng Allah Sasaating Nawa) sa mga kapatid na nanampalataya sa Islam, o sa  mga kapatid na Muslim.

Kahapon araw ng ng Martes ay ibinaba na ang hatol ng 23 senador ng bansang Pilipinas  sa impeachment court sa pamamagitan ng mga senador na nagsilbing hukom sa kaso ni Supreme Court Chief Justice Renato Corona.

Ang tanong ng nakakaraming Pilipino ay sino ba itong si  Renato  Corona?

Kapatid na nakikinig medyo bubuksan natin ang aklat tungkol kay  Renato Corona.

Si Chief Justice o CJ Corona ang ika-23 Punong Mahistrado ng Kataas-taasang Hukuman (Supreme Court)  ng Pilipinas ay nilitis ng Kapulungan ng mga Kinatawan (House of Congress)  noong Disyembre 12, 2011.  Siya ay “midnight appointees” (katawagan sa pagtatalaga sa isang opisyal sa panahong malapit na matapos ang panunungkulan ng opisyal na may kapangyarihang magtalaga rito)  ni dating pangulong GMA.

May 188 kinatawan ang lumagda sa reklamong impeachment laban kaya  CJ Corona na mahigit sa kinakailangang 95 boto o isang-katlo (⅓) ng lahat ng kagawad ng Kapulungan na bumibilang sa 285.

Anong kaso ang inihaian  sa sakanya?  Inakusahan si CJ Corona ng pagkakanulo sa pagtitiwala ng bayan, tandisang paglabag sa konstitusyon, at pagnanakaw at katiwalian na ipinaloob sa walong kaso.

 Nagsimula ang paglilitis ng Punong Mahistrado sa Senado noong Enero 16, 2012 at nagtapos kahapon Mayo 29, 2012 at nagkabotohan sa article II ang 23 senador at   20 ang bomoto na   nagkasala si CJ Corona.

Ano ang nakapaloob sa article II na unang pinagbotohan?

Hindi pagsasapubliko ng kanyang pahayag ng ari-arian, pananagutan at aktuwal na kabuuang ari-arian, na kinakailangan sa ilalim ng konstitusyon.          At ang paglabag dito ay ang pagkakanulo sa pagtitiwala ng taong bayan  o hayagang paglabag sa batas ng Pilipinas.

Ang pangatlo o  article III ay hindi na napagbotohan dahil sa  article II palamang ay guilty na ang hatol kay CJ Corona.

Ano ang nakasaad naman sa article III?

“Kabiguang matamo at sumunod sa mahigpit na pamantayan ng konstitusyon na nagsasaad na: "ang isang kagawad ng hukuman ay kinakailangang nag-aangkin ng subok na kakayahan, kalinisang-budhi, katapatan, at malayang pag-iisip" sa pagpapahintulot sa Korte Suprema na gumawa ng hakbang bunsod lamang sa isang liham na isinumite ng isang abogado sa kaso na nagdulot ng pabago-bagong desisyon sa mga kasong isinapinal at isasakatuparan; pagpapanatili ng labis na kaugnayan kay Gng. Arroyo nang maitalaga sa posisyon ang kanyang asawa, at pakikipag-usap sa mga nag-aasunto hinggil sa mga kasong nakabinbin sa Korte Suprema.”         

At ang paglabag dito ay ang pagkakanulo sa pagtitiwala ng bayan  o hayagang  paglabag sa konstitusyon.

Ang pagpanig, ni  CJ Corona pabor sa dating Pangulong Gloria Macapagal-Arroyo at kanyang asawang si Jose Miguel Arroyo sa pagbibigay ng kautusan ng pansamantalang pagpigil (TRO) upang bigyan ng pagkakataong matakasan ang pag-uusig at tuluyang mapigilan ang pagpapatupad ng katarungan, at sa pagbabaluktot sa desisyon ng Korte Suprema sa pagpapatupad ng TRO sa harap ng kabiguang makasunod sa mga kondisyon ng sarili nitong TRO.    At ang paglabag dito ay pagkakanulo sa pagtitiwala ng bayan.

Ang lima pang inihain na kaso samababang kapulungan ay hindi na itinuloy sa pagdinig, kaya ang tatlo lamang ang pinag-usapan ng mga  senador Judges, dahil iniatras na  ng persecution.

Ano ang mangyayari kay CJ Corona dahil  nahatulan na guilty?

Maaalis lamang siya sa trabaho bilang punong mahistrado o Chief  Justice.

Mabibilanggo ba siya o  magmumulta?

Hindi po.

Asahan na natin na kanya-kanyang payabangan  ang ilang grupo na pinaboran ng hatol pero alam naman nating lahat na may halong pulitika ang naging desisyon ng impeachment court at hindi maihahambing sa isang kasong kriminal na nilitas sa isang pangkaraniwang korte.

Magandang tiyempo rin ang impeachment na ito dahil may pagkakataon mismo ang taumbayan na makapagbigay din ng desisyon at ito ay sa 2013 midterm elections kung saan ay maraming mga reeleksiyunistang senador ang muling kakandidato.

Sabi n g ating friend sa facebook: “Dito ay malalaman natin kung ano ang paghuhusga ng taumbayan sa isang senador kung ano ang naging boto naman sa impeachment ni Corona, guilty or not guilty. Samantala, sa pagbaba ng hatol ng mga senator judge ay makabubuting kalimutan na ang isyu ng impeachment at sana, sa muling pagtuunan ng pansin ng mga senador at kongresista at iba pang opisyal ng gobyerno ang tunay na problema ng taumbayan at ito ay ang kahirapan at kagutuman sa bansa.  Asahan na natin na bagamat hindi nila ito aaminin ay mas uunahin ng ilan na mangampanya at matiyak na sila ay mananalo sa kani-kanilang mga inaasintang posisyon sa gobyerno.”

Sa panig naman ng kampo na CJ Corona, ay naiulat sa himpilan ng radio sa Maynila ang DZMM:  “Tanggap ni Supreme Court (SC) Chief Justice Renato Corona ang desisyon ng impeachment court na patalsikin siya sa pwesto.

Sa kanyang official statement, sinabi ng punong mahistrado na bagama't ikinalulungkot niya ang hatol ng 20 senator-judges ay susundin niya ang kautusan ng Senate impeachment court para sa ikabubuti ng taumbayan at ikatatahimik ng kanyang pamilya.

Aniya, sa loob ng halos limang buwan ay buong tapang niyang hinarap ang mga maling akusasyon laban sa kanya at kanyang pamilya sa pag-asang makamit ang hustisya at ang kasarinlan ng Hudikatura.

Pero hindi aniya niya ito nakamit at sa halip ay nangibabaw ang pagsasabwatan ng administrasyong Aquino at nanaig ang masamang pulitika.

"Wala po akong sala. Wala pong katotohanan ang mga bintang sa akin na nakapaloob sa Articles of Impeachment. Malinis po ang konsyensiya ko. Ngunit isang malungkot na katotohanang pulitikal na minsan ang tingin ng nakararami na nangyari, ay hindi naaayon sa tunay na mga naganap."

Gayunpaman, gusto na aniya niyang matapos ang isyu ng impeachment na matagal na ring gumagambala sa bansa.

Hinimok pa nito ang lahat ng opisyal ng gobyerno maging ang publiko na tigilan na ang paninira at sa halip ay magkaisa para sa ikabubuti ng bansa.

"Ihinto na po natin ang pulitika ng personal na paninira. Supilin na po natin ang lason na dulot ng labis na kampi-kampihan, labis na pagkakawatak-watak, at hindi mapigilang poot at galit. Hindi po ito ang nararapat para sa ating bayan."

Nagpasalamat din ang punong mahistrado sa lahat ng sumuporta sa kanya at kina Senator-judges Miriam Santiago, Bongbong Marcos at Joker Arroyo na bumoto para i-acquit siya.

Sa huli, ipinaubaya na ni Corona sa Maykapal at sa taumbayan na aniya'y mas makapangyarihan sa demokrasya ang kanyang kahahantungan at ang kinabukasan ng Hudikatura sa bansa.”

Mga kapatid na nakikinig, ang nangyari ay isang aral sa lahat ng Pilipino na ang batas ay pantay-pantay, maging sinuman   ay batas ay batas  na  dapat mapairal, walang racial discrimination, mahirap o mayaman, ay pantay pantay ang tao sa mata ng batas kaya tinawag itong may piring ang katarungan.

Ito po ang  inyong kapatid Kaka Alih, Sukran Wassallam.

Note: ang article na ito ay na-ipost na sa blog na DXUP.MULTIPLY.COM (dated May 30, 2012) at dahil nagsara na ang Multiply, ay minabuti naming ipost muli sa bago nating  blog: DXUP Teleradyo..(from admin: Alih Anso)